飛

某日與攝影師同事閒聊，談起生仔生女的話題，我說我喜歡仔多一點（豹豹也是仔），他說：「仔唔好呀，唔返屋企架！」我說：「唔會呀，我細佬都幾好。」他說：「咁你屋企應該好溫暖。」

弟弟剛去了玩snowboard，我的態度一直是叫他玩多啲啦，第時返香港唔知幾時先有得去。
今晚匯報公公，他十分高興，笑笑口說：「雖然我自己冇得去，見到個孫咁開心，我都好開心，叫佢去多幾次呀，第時唔知仲有冇機會。」
心裡一陣感動。
我說：「係啦，仲要係瑞士呀。我去日本讀書嗰時都滑咗兩次雪呀，好玩呀。」
公公：「真係好。有機會真係要畀下一代去外國見識吓，去玩吓都係好事。」
（然後每次弟弟打電話回來，公公總是問他夠不夠錢用，我每次聽到，又是很感動。）

我想說的是，我們家裡有公公這個靈魂人物，讓我們甚麼也不用擔心，飛出去看世界，然後讓我們知道，在外面風風雨雨過後，這個家總是暖暖的充滿著愛等著我們。有這樣的家我們怎會不回家呢。
大概我這樣愛玩的性格也是從你而來的。