Buy Me A Sunday：飲！（轉載15/11/09蘋果日報）
Text by黃偉文
嘩，奇景。
十年唔肯去飲一次的我，因為這一晚擺酒的那一位實在親，所以推無可推，惟有去。
嘩，一入場就見到奇景！
100位女賓客，不計高矮肥瘦黑白老嫩， 99位着制服！去飲都着制服？去飲唔係着飲衫咩？你一定會問。
你對，但我也沒錯。她們個個着了飲衫，但對我來說卻是清一色的法西斯式戰衣。
今日這個陣，應該叫：「千人一肩」。
這班來自不同地方家族的女人，不知是怎麼約定的，全場只有兩款披肩，姑勿論她們底下蓋着的是吊帶喱士露肩還是泰山裝（反正都被冚住，不重要了），又要露少少肉（以對「去飲」這隆重場合有所交代）又怕冷的她們，都幫襯了「披肩套餐 A」或「披肩套餐 B」。
「披肩套餐 A」：超短廉價動物毛披肩，通常只遮到膊頭心口及後肩雞翼位一帶，故作可愛地去到胸線以上就完（實際上是為了慳布料吧），而中間開胸，為了固定位置的扣鈕位（如果我沒記錯，應該是 Miuccia Prada害的，是她的概念經歷七、八年幾十手的偷師變種而成的）用的是一條粗絲帶。為了增加豪華感，披肩選用了真正的動物皮毛作材料；但為了減輕成本降低售價，通常只是真的狼毛或兔毛；而為了令它們廉價得來似豪華，生產者除了黑白啡灰外，很多時還會鬼五馬六地將毛毛染成粉紅、粉藍、桃紅、姣紫……以為這樣就可以令人看不出那幅料是平嘢，其實他們偏偏替個 cheap字裝滿了燈膽，欲蓋彌彰個「彰」。
「披肩套餐 B」：仙女式透視薄紗乙條，有時繡花有時唔繡，有時釘珠片有時唔釘，豐儉由人，但重點不是這塊嘢的設計，而是它的穿法， to be exact，綁法。基本的圍繞軌迹是傳統的─包裹着背脊上截，兩邊再兜過「老鼠仔」經「胳肋底」回到「拜拜肉」，之後任由披肩頭尾隨地心吸力下垂─對，這就是傳統的披肩披法，但披過的人都知，這樣做會一路郁一路走位，披肩會甩吓甩吓，要時時「扶正」，好麻煩，而且敬酒夾餸時「吊吊 fing」的南北極很容易賴嘢，沾到枱面上的豉油或者汽水或者雞絲翅，所以聰明的太太小姐們就趁這 10年我沒有去飲，偷偷地發明了一種新綁法─續「傳統式」由「拜拜肉」以下，披肩兩邊的 loose ends急轉彎在主人後腰尾龍骨底重逢，並巧妙地結成蝴蝶結完成全套動作─原意大概是要模仿奔月的嫦娥吧！我卻認為這種綁法是「大閘蟹」式。
對，全場女人就只有「廉價兔毛小斗篷」和「大閘蟹式輕紗披肩」兩種，不但沒有人覺得怪相，反而好像不採用套餐 A或 B就不似去飲似的。
到底，香港人的飲衫發生了甚麼事？
香港人幾時開始變成這樣的飲樣？
想像力去了哪裏？
如果將「飲衫」視為「戰衣」，壓力是有點大的，大家的理論上「扮到最靚」，如果「我的最靚」不及「你的最靚」靚，咁咪好 hurt？
但我是情願有這種壓力的，因為問題就是大家太冇──我去得太多三個月前發定帖畀定 dress code，但到最後，一枱 12位有 7個是「求其着套平時去街都有見佢着的 casual衫」嚟啲所謂 party或宴會。
都唔好玩嘅。
「冇時間」不是理由，「搵唔到衫」比較可接受（因為聽起來似有努力過，是大話也是個較畀面你的大話），但以後也別這麼說了，因為我今日打算教你化解「搵唔到衫」。
陳奕迅和他的 280個 Demo
最近為一位朋友找一條裙子（對，比「飲衫」更嚴重的那種級數：奧斯卡晚裝），頻來撲去，兩腳行勻港九新界，電訊縱橫巴黎米蘭，換句話說，整個地球都幾乎找遍了，那條 dream dress還是無影無蹤十畫都無一撇，勞心勞力到一個地步，我有時會想：搵飲衫的人如果換了是我，會不會一樣狼狽？
我一定不會。
因為平時我已經買埋買埋好多「飲衫」，多到甚至無可能有咁多「飲」可以去的程度。以前我有試過 feel guilty，但自從我看通了「碌卡時有快樂過一秒已不枉」這個道理，早已釋懷，如今還多了一個理由（好像獲得額外的花紅一樣）：就算我明天忽然無厘頭如奧巴馬，獲頒諾貝爾獎，至少着乜我都唔使愁。
你明我講咩嘅~因為你一定試過三日後要去 party，臨急抱不到佛腳，行到腳爛都未搵到一套又靚又 fit價位又啱的「飲衫」，結果勉為其難揀了件 70分了，花了錢又唔覺得自己特別靚，幾沮喪。
所以如果你視「得閒無事買定件 Monique Lhuillier」為浪費，因為你連帖都未收到有冇得去飲都未知，因為你好驚得個「躉」字，卒之擺到過季唔興……不如你試試這樣思考，那條裙錢當買了保險吧，個個月進貢燕梳公司的你所承受的風險都一樣啫，當然也有「供死會」的機會，但萬一有起乜嘢冬瓜豆腐，一份好的保單和一套靚的飲衫一樣，是有得賠的。
本地作曲家之間的江湖傳聞：陳奕迅先生部 notebook之內是長期 keep起 200幾首歌的 demo的，不「平時買定」不「精挑細選」，如何一次又一次做出超好聽的唱片？明未？
本周測試
甚麼樣的衫應該買？甚麼樣的衫其實不用買？到底怎樣分辨？
最近和四奶奶去置裝，時時見她對鏡苦惱 to be or not to be，我終於不忍心拿出了私伙心得和她分享。
我這個方法叫「轉圈測試」。
着起了一件衫，照鏡，如果無端端自己想轉圈的，唔使諗，即買！
p.s. 雖則說是i can't agree more，但也未去到有買定飲衫的財力，更沒有需要這種盛裝的飲宴，但這種精神，我好buy！
原文有相+caption，必看。
Posts
